නිවාඩුව

අපේ ගෙදර ඉස්කෝලෙ නිවාඩු දුන්නම සතුටින් පිරෙනවා.ගෙදර හදල තියෙන කෑම බීම අම්ම හංගලා තියනවා.අපි බස් එකක් එනකං ඉස්සරහට වෙලා බලාගෙන ඉන්නවා.ඇයි දන්නවද...?නිවාඩු කාලෙට අයියා ගෙදර එනකන්.

අයියා 5 වසරේ ශිෂ්‍යත්ව විභාගෙ පාස්වෙලා කොළඹ ගියා.එයා නැවතිලා හිටියෙ නැන්දා කෙනෙක්ගෙ ගෙදර.

ඉතිං අපිට අයියා දකින්න වෙන්නෙ ඉස්කෝලෙ නිවාඩු කාලෙට විතරයි.

ඔන්න ඉතිං අයියත් ගෙදරට ආවම ,අම්ම හංගල තියෙන කෑම ජාති ඔක්කොම එලියට අරන් අයියට දෙනවා

කන්න.අපේ අයියා වැඩි පුරම ආස දොදොල් කන්න.අනෙක් කෑම ජාති ඒ තරම් කන්නෙ නෑ.ඉතිං ඒන කන්න නංගියි මමයි අයිය ලගට වෙලා ඉන්නවා.

අයියා කිළුටු රෙදි ලෝඩ් එකක් ගේනවා.මන් ළිඳට ගිහිල්ලා ඒවා ඔක්කොම හෝදනවා.හොදලා ගෙනල්ල වනනවා.අයියා මට ඒවට සල්ලි දෙනවා.

ටික දවසක් ගෙදර හිටියට පස්සෙ අපි යනවා තාත්තගෙ මහ ගෙදර.තාත්තගෙ මහ ගෙදර තිබුණෙ රක්වානෙ.මහ පන්නිල කියන ගමේ.හරියටම කියනවානම් සිංහරාජ කැලේ.

ඔය ගමට යන්න බස් තිබුණෙ නැහැ.ඉස්ටෝරු කඩේ ගාවින් බැහැලා පයින්ම තමයි යන්න ඕනි.ඉතිං අපි පොඩි නිසා අපිට පයින් යන්න අමාරුයි.රූස්ස වනාන්තරය මැදින් ,කණාමැදිරි කැ ගහක සද්දෙ අස්සෙන්

අපි යනවා කන්ද මුදුනටම.

ඒ යන මග තියෙන ලොකු ඇළවල් වලින් අපිට එගොඩ වෙන්න බැහැ.ඉතිං මහප්පගෙ අයියල දෙන්න එනවා මගට.අපි යන්නෙ අයියලගෙ කර උඩින්.

මග දිගට හිඹුටු වැල් පිිලා.මී අඹ ගස් යට වැටිලා.අපි ඉතිං යන්කොට මග දිගට ඒවා කකා යනවා.දොලක් ගාව නැවතිලා උදේට අම්මා ගෙදරින් හදල දීපු මොනවාහරි කනවා.දොලෙන්ම වතුරත් බොනවා.හරිම සීතල වතුර.ආසාවේ බැහැ.

කොහොම හරි ගම්මානෙට ආවා කියමුකො.ඊ ගාවට ගෙදරට යන්න වෙල පහු කරන්න ඕනි.හැතැම්ම ගානක් දුරට බැලුවම පේන්නෙ වෙල.නිල්ල පිරුණු ගොයම සර සර ගාලා හුලඟට වැනෙනවා.ආසාවේ බැ.

උදා හිරු රැස් වැදිලා,සිසිල් සුලඟ ගත දැවටිලා,පුංචි පිණි බිඳු දෙපාවල දැවටෙන කෙකාට දැනෙන්නෙ හරිම හුරතලයක්.

වෙල ඉවරවුණු තැක තියෙන්නෙ මහ විසාල දෙල් ගහක්.ඊට එහායින් පේන්නෙ ආතාගෙ කොට්ටුව.අපේ පැත්තෙනම් කියන්නෙ කොටුව කියලනේ.ඒත් ඒ පැත්තෙ කිව්වෙ කොට්ටුව කියලා.ඔය කොට්ටුවේ පොල්,එනසල්,කෙසෙල්,අඹ,කිතුල්.කරාබු ලස් පිරිලා තිබුණා.කෙසෙලේ කැන් වල ගෙඩි පිරිලා ඉදිලා කහම කහ පාටයි.

තාත්තගෙ ගෙදර තිබුණෙ කන්ද මුදුනක.ගිය ගමන් ආතාට දණ ගහල වදිනවා.ආතා ලොකු නැන්දට කතා කරල අපිට තේ හදන්න තියනවා.නැන්ද කෙසෙල් ගෙඩි එක්ක හකුරු ගේනවා කන්න.අපි බඩ පිරෙනකන් කනවා.ඊට පස්සෙ කහට බොනවා.ඒ හකුරු තියෙන්නෙ ගුලි විදියට.හරිම රසයි.

ඊ ලඟට අපි දුවන්නෙ පීල්ලට.ගෙට ටිකක් දුරින් තමයි පීල්ල තිබුණෙ.එතන වතුර පාරෙ කකුළුවො ඉන්නවා .අපි උන්ව අල්ලනවා.

පිල්ලට ඔලුව අල්ලද්දි ඔලුව ගැලවෙන තරම්.ඒ මදිවට සීතල.කිටි කිටි ගාලා වේව්ලනවා.කොහොමත් පැය දෙක තුනක් නම් අපි වතුරෙ ඉන්නවා. ගොඩට ඇවිත් දුවගෙන ගෙදරට යනවා.ගෙදරට ගියාම කොස් මාලුවක්.හාල්මැස්සන් හොද්දක්,ගොටුකොල සම්බෝලයක් බිත්තරයක් එක්ක රතු කැකුළු බත් පිඟානක් බෙදල දෙනවා කන්න.මම ආසා බත් දංකුඩය කන්න.රතු කැකුළු හාල් වංගෙඩියෙ කොටල තමයි බත් උයන්නෙ.එතකොට දංකුඩය හරිම රසයි.