ගුරුතුමිය...

පොඩි පංති කාමරයෙ
ඔබ අකුරු කරන කොට
ඉඳන් මම ඔබ ගාව
ඔබේ හැඩ බලන්නෙමි
ඔබේ හඬ නැගෙන විට
තිගැස්සී බලන්නෙමි

ලස්සනට ඔසරියෙන්
සැරසිලා ඉන්නකොට
බැඳි කොණ්ඩෙන් මුහුණෙ
හැඩය තව දකින්නෙමි
ඉනට බැඳි හවඩියේ
සිළි සිළිය අසන්නෙමි

හුණු කූර අල්ලගෙන
බිත්තියේ ලියනකොට
ඔබේ දිගු වරලසේ
හැඩය මම දකින්නෙමි
දිගු ඇඟිලි නිය පිරුණු
ලස්සනයි සිතන්නෙමි

රවුමකට පුටු තියන්
අපි කවක් කියනකොට
ඔබේ හඬ මොනතරම්
මිහිරිදැයි සිතන්නෙමි
ඔබේ පොඩි නැටුමකින්
තවත් හැඩ දකින්නෙමි

පාසලින් සමුගත්ත
අවසාන දිනේදිත්
ඔබෙ දයාබර හඬම
යළි යළිත් ඇසෙන්නෙමි
තබා හිස දෙපා මුල
බැති සිතින් පුදන්නෙමි